La nott l'ha slargaa foeura el sò mantell

che on bagn de luna ha pitturaa d'argent.

La carezza del vent

la giuga dent i ramm, i proeus, i ortaj

con riverenza, senza fà frecass...

...mur bass, bianch de calcina,

on lumm in la cusina e on fil de fumm...

bras che consuma dent el fogoraa...

el pòr disnà l'è pront.

Composta in del Sò vel,

la Divina Resgiora

la và, la ven, la ..truscia,

la sfiora con pudor,

intant che Le serviss l'ul tima volta,

la testa dòra e i man del Sò Signor,

la Ghe sorid, la voeur parì serèna

per quattà-giò la pèna del distacch...

La bisacca l'è pronta: olive mel,

formagella, pomm secch, e pan da cà.

"Mader...(la va... la ven...)

Mader,ven chì vesin, sta chì on moment..."

- Bagai, coeur del mè coeur...

e coi manitt d'avori

La quatta de carezz

i fattezz del Sò Ben, pregna d'amor,

poeu, per scond el brusor che panna i oeucc,

dal portisoeu che da su l'ortesell

leggera 'me on fringuell la sgora via...

(...doe Te vet o Maria

a piang el tè magon ?)

 Vann chi pescitt a scur,

(ponden sicur a 'na paret de sass,

la spelonca l'è averta, senza uss,

sit de travaj on temp, desert incoeu:

pù resegusc, ne ass, ne foeugh impizz...

...piegada su on bancon de legnamee,

testimoni la nott che scolta e tas,

la piang in pas, e i stell piangen con Lee...

 .................................

..................................

On pass che 'l par de seda,

on'ombra, ona carezza e la “Soa” vos:

"Mamma., o Mamma Santa, Benedetta,

perchè sti lagrim?” e se le tira press,

el se streng in sul coeur

quell “Tutt" che doeur, che doeur domà per Lù...

“Mamma...”l - Gesù... Gesù...

Adasi,adasi per el sentiroeu

vegnen invers la cà..

La bisacca l'è là col Sò mantell,

i piegh de comedà, i ultim carezz,

i ultim paroll sott vos e poeu 'L s'invia.

Per tre volt El se gira, El benediss

poeu El scantona e 'L spariss per el sentee...

  …………………………

……………  ……………

Dedree d’on uss saraa

on mond che cròda,

on spasim senza vos,

on “Coeur” giamò inciodaa sora la cros.

Ada Lauzi